ராகுலை எதிர்த்து களமிறங்கும் ஸ்மிருதி இரானி.., பாஜக வேட்பாளர் பட்டியல்

453

நடக்க இருக்கின்ற பாராளுமன்ற தேர்தலில் போட்டியிடும் 184 பாஜக வேட்பாளர்களின் பெயர்கள் கொண்ட முதல் பட்டியலை டெல்லியில் மத்திய மந்திரி ஜே.பி.நட்டா இன்றிரவு வெளியிட்டார். பிரதமர் நரேந்திர மோடி உத்தரபிரதேசம் மாநிலத்தில் உள்ள வாரணாசி தொகுதியில் மீண்டும் போட்டியிடுகிறார்.

பாஜக மூத்த தலைவர் அத்வானி எம்.பி.யாக பதவி வகிக்கும் குஜராத் மாநிலத்தில் உள்ள காந்திநகர் தொகுதியில் தேசிய தலைவர் அமித் ஷா இந்த தேர்தலில் நிற்கிறார். மத்திய மந்திரி நிதின் கட்காரி நாக்பூர் தொகுதியிலும், ராஜ்நாத் சிங் லக்னோவிலும், வி.கே.சிங் காசியாபாத் தொகுதியிலும், நடிகை ஹேமா மாலினி மதுரா தொகுதியிலும் போட்டியிடுகின்றனர்.

மத்திய மந்திரி ஸ்மிருதி இரானி இந்த முறையும் அமேதி தொகுதியில் ராகுல் காந்தியை எதிர்த்து போட்டியிடுகிறார்.

கடந்த 2014-ம் ஆண்டு நடைபெற்ற பாராளுமன்ற தேர்தலில் அமேதியில் போட்டியிட்ட ராகுல் காந்தி 4 லட்சத்து 8 ஆயிரத்து 651 வாக்குகளை வாங்கி வெற்றியடைந்தார். பாஜக வேட்பாளராக அவரை எதிர்த்து நின்ற ஸ்மிருதி இரானி ஒரு லட்சத்துக்கும் அதிகமான வாக்குகள் வித்தியாசத்தில் தோல்வி அடைந்தார் என்பது குறிப்பிடத்தக்கது.